Dr Thangtea chuan thusawiin, "MNF sorkar lai khan in MLA chak tak Pu Rintluanga Sailo hmalaknain hmunphiah kg-ah 120 leh 130-in in hralh ṭhin a. Tun sorkarah erawh kg-ah Rs 50 vel chauhin in hralh thei ta hi a pawi ka ti hle a ni. Buhfai man a leta tih to a nite hi mipuiin kan tuar nasa em em a, a pawi hle a ni," a ti.

MNF Sr Vice President chuan, "Power supply a mumal lo em emte hi a pawi a, chu mai bakah tun hnaiah  electric bill a let awlh awlha a to tate hi a pawi tak zet a ni," a ti a. "ZPM sorkar hnuaiah ni 100 inhlawhna leh mipui vantlang inhlawhna a lo vang ta te hi a pawi hle a. Pukzing leh Silsuri inkar kawng a kal theih loh ringawt maite hi a vanduaithlak hle a ni," a ti a. West Phaileng to Marpara kawng Pu Rintluanga Sailo zara a lo ṭha tate hi a lawmawm tak zet a. Tunhnaiah hma an la chak lo hi a pawi hle. Marpara khaw chhung kawng chhe lutukte hi a vei awm em em a ni," a ti bawk.  

  

Marpara mipuite chuan Dr Thangtea hnenah Marpara High school, Minister a nih hunlaia  provincialised a ni ta leh Marpara PHC hun rei tak building chhe em em Health Minister a nih laia sak thar a ni chu lawmthu an lo hrilh a. Term 6 lai mai MLA lo ni tawh, senior politician an bialah a lo ding chu lawmawm an tih thu an lo sawi bawk a ni.